میرا پاکستان نے 13 سوالات کے درست جوابات دئیے جبکہ شعیب، شگفتہ اور شاہدہ اکرم نے 12, 12 سوالوں کے درست جواب دئیے ہیں۔

میرا پاکستان:

شعیب صفدر :

شگفتہ :

شاہدہ اکرم :

درست جوابات درج ذیل ہیں۔ اگر نتائج میں آپ کو کسی قسم کی غلطی محسوس ہو تو آگاہ کریں۔

1- پاکستان کے قومی ترانے کی دھن کب مرتب کی گئی تھی؟

1949 میں

2 -  قیامِ پاکستان کی تجویز سب سے پہلے کس نے پیش کی؟

علامہ اقبال

3 - برطانوی حکومت نے تقسیمِ ہند یعنی قیامِ پاکستان کا اعلان کب کیا؟

3 جون 1947

4 - برصغیر میں مسلمانوں کے لیے کس مدبر شخص نے سب سے پہلے “قوم” کا لفظ استعمال کیا تھا؟

سر سید احمد خان

5 -  سب سے پہلا پاکستانی پرچم کس نے تیار کیا تھا؟

اقبال احمد خان(جبکہ پرچم کا ڈیزائن امیرالدین قدوائی نے تیار کیا تھا)

6 - پاکستان کو سب سے پہلے کس اسلامی ملک نے تسلیم کیا؟

ایران

7 - پاکستان کا سب سے پہلے جاری ہونے والا اخبار کون سا تھا؟

روزنامہ امروز لاہور

8 -  پاکستان کا قومی پرچم سب سے پہلے کہاں لہرایا گیا تھا؟

کراچی

9 - پاکستان کا پہلا ڈاک ٹکٹ کب جاری ہوا؟

9 جولائی  1948

10 - پاکستان کی سرکاری زبان کون سی ہے؟

دونوں

11 - قائداعظم قیام پاکستان کے بعد کتنا عرصہ حیات رہے؟

تیرہ ماہ

12- پاکستان کا تیسرا بڑا پہاڑ کون سا ہے؟

Gasherbrum-I

13- شلوار قمیض کو پاکستان میں قومی لباس کی حیثیت کب دی گئی؟

یکم دسمبر 1981

14- “پاکستان  اسلام کی تجربہ گاہ بنانے کے لیے حاصل کیا گیا ہے” یہ فرمان کس کا ہے؟

قائداعظم

15- پاکستان کا قومی جانور کون سا ہے؟
مارخور

کیا حال ہیں ماوراء؟

میں ٹھیک ہوں عمار۔۔۔ تم سناؤ!

میں بھی ٹھیک، الحمد للہ۔ تمہارے پاس کون سی تحریر ہے پہلے؟

میں نے جو پہلی تحریر منتخب کی ہے، وہ ابوشامل کی تحقیق ہے جو انہوں نے کولا وار کے خاتمے کے موضوع پر کی ہے اور اس کا عنوان ہے “کولا وار خاتمے کی جانب گامزن“۔ ابوشامل نسبتا نئے بلاگر ہیں لیکن بہت ہی پختہ لکھاری ہیں۔ صحافت کے شعبہ سے ان کے تعلق اور تجربے کا اندازہ ان کی کئی تحاریر سے ہوتا ہے اور یہ تحریر بھی اس کا ایک ثبوت ہے۔ اس میں ابوشامل نے اعداد و شمار اور رپورٹس کی مدد سے بتایا ہے کہ سوفٹ ڈرنکس کے مضر اثرات کے باعث اب یہ صنعت کافی متاثر ہوئی ہے اور کمپنیز اب متبادل کی طرف راغب ہورہی ہیں۔ آپ لکھتے ہیں:

“سافٹ ڈرنکس کے صحت پر اثرات کے حوالے سے رپورٹس سامنے آتے ہی 90ء کی دہائی کے اوائل سے ہی “جنم بھومی” امریکہ میں سافٹ ڈرنکس کا استعمال کم ہونا شروع ہو گیا اور اب یہ صنعت مسلسل روبہ زوال ہے بلکہ گزشتہ دو سالوں سے تو اس زوال میں مزید تیزی آ رہی ہے۔ Beverage Digest کے مطابق امریکہ میں کاربورنیٹڈ سافٹ ڈرنکس کی مارکیٹ میں حجم کے اعتبار سے 2007ء میں 2.3 فیصد کمی آئی جبکہ 2006ء میں یہ کمی 0.6 اور 2005ء میں 0.2 فیصد تھی۔ ان اعداد و شمار میں انرجی ڈرنکس بھی شامل ہیں البتہ معدنی پانی، اسپورٹس ڈرنکس، تیار شدہ چائے وغیرہ شامل نہیں۔”

آگے چل کر سافٹ ڈرنکس بنانے والے اداروں کے حوالہ سے لکھا ہے:

“انہوں نے مغربی دنیا میں معدنی پانی اور پھلوں کے جوسز کے کاروبار پر توجہ مرکوز کر لی۔ پیپسی نے “Aquafina” نامی معدنی پانی مارکیٹ میں متعارف کروایا تو کوکا کولا “Kinley” لے آیا۔ آخر الذکر Minute maid کے ساتھ جوس مارکیٹ میں لایا تو اول الذکر نے Tropicana Twister متعارف کرادیا۔ حتٰی کہ اب Kurkure جیسے برانڈز تک متعارف کرانا پڑ رہے ہیں تاکہ متبادل ذرائع سے آمدنی کو سہارا دیا جاسکے یا بڑھایا جا سکے۔”

تمہارے پاس کون سی تحریر ہے عمار؟

میرے پاس تحریر ہے نعمان کی: “کراچی کی طالبانائزیشن“۔ یہ پاکستان اور خاص کر کراچی کی سیاسی اور علاقائی صورتحال کے حوالہ سے ایک اہم تحریر ہے۔ گذشتہ کچھ عرصہ سے ایم۔کیو۔ایم کی جانب سے کراچی میں طالبان کی بڑھتی ہوئی تعداد پر مسلسل آواز اٹھائی جارہی ہے۔ نعمان نے اس پر کافی طویل اور سیر حاصل گفتگو کی ہے۔ نعمان لکھتے ہیں:

” ایم کیو ایم کو پختونوں کی اتنی بڑی تعداد میں آمد پر سخت تشویش ہے۔ کیونکہ ایک تو یہ سراسر ان کے ووٹ بینک کے لئے نقصان دہ ہوگا۔ دوسرا انہیں ایک اور عفریت کا سامنا کرنا پڑ رہا ہے جس کا نام ہے لینڈ مافیا۔ اس لینڈ مافیا کو بڑی سیاسی جماعتوں، مولویوں اور ہر کرپٹ فرد کی حمایت حاصل ہوتی ہے۔ غریب پختونوں کی کچی آبادیوں کے نام پر زمینوں پر قبضے کرے جارہیں جب کہ ان زمینوں کو اگر واگزار کرانے کی کوشش کی جائے تو اسے لسانی رنگ دے دیا جاتا ہے۔

دوسرا ایشو یہ ہے کہ اتنی بڑی تعداد میں کٹر مذہبی رویہ رکھنے والے لوگوں کی شہر میں آمد سے سنگین امن و امان کے مسائل پیدا ہوسکتے ہیں۔ ایک تو ان آنے والوں میں بڑی تعداد نوجوانوں کی ہے۔ اوپر سے یہ تمام نوجوان غیر تعلیم یافتہ، بے ہنر، اور بے حد غربت کا شکار ہیں۔ آپ اندازہ لگا سکتے ہیں کہ انہیں کسی بھی لسانی، سیاسی، یا نام نہاد مذہبی فساد میں استعمال کرنا کتنا آسان ہوجاتا ہے جب وہ پہلے ہی غربت، احساس محرومی اور ناانصافی کا شکار ہوں۔ اس وقت کراچی میں یہی ہورہا ہے۔”

مسئلہ اور اس کے مختلف پہلوؤں کا جائزہ لینے کے بعد نعمان اپنی تجاویز پیش کرتے ہوئے رقم طراز ہیں:

“میرا خیال ہے کہ آنے والے قبائلی و دیگر پختونوں کو اپنے بچوں کو اسکولوں میں بھیجنا چاہئے۔ اور حکومت کو ایسا انتظام کرنا چاہئے کہ کوئی ان کی معاشی مجبوریوں کا استحصال نہ کرے۔ پختونوں کی مرضی سے کراچی کے پہلے سے قائم معیاری مدارس کی زیر نگرانی چلنے والے مدرسوں کو ہی ان کے محلوں میں تعلیم دینے کی اجازت دی جانی چاہے۔ حکومت سندھ کو ام احسان سمیت تمام ایسے لوگوں پر پابندی لگانی چاہئے جو انتہاپسندی پر مبنی نظریات کا پرچار کرنے کراچی آتے ہیں۔ شہری حکومت کو لینڈ مافیا سے لڑنے کا مکمل اختیار ہونا چاہئے۔جرگوں پر مکمل پابندی ہونی چاہئے۔ اور پختون ایکشن کمیٹی کی بلیک میلنگ کے خلاف سخت سے سخت ایکشن لینا چاہیے۔ جو بھی شہر کو قبائلی علاقہ سمجھنے کی حماقت کرے اور اسے صوبے سے باہر نکال دیا جائے۔”

یہ تحریر جس قدر اہم ہے، اسی قدر متنازعہ بھی۔ اس پر افتخار اجمل، میرا پاکستان اور فیصل کے طویل تبصرے پڑھنا بھی معلومات میں اضافہ کا سبب بنیں گے۔

جی ماوراء!

میرے پاس اگلی تحریر اردو بلاگنگ میں نووارد بلاگر عارم پاکستانی کی ہے۔ انہوں نے پچھلے دنوں ہی بلاگ لکھنا شروع کیا ہے اور اس وقت میرے پیش نظر ان کی تحریر “بھیک” ہے۔ اس سے پہلے عارم نے ایک تحریر “افراد کے ہاتھوں میں ہے اقوام کی تقدیر” بھی بہت خوبصورت لکھی تھی۔ حالیہ تحریر میں انہوں نے اپنے اردگرد کی صورتحال بیان کرتے ہوئے یہ بتایا ہے کہ اوپر سے لے کر نیچے تک، بھکاریوں کی تعداد بڑھتی ہی چلی جارہی ہے۔

تحریر کے شروع میں عارم لکھتے ہیں کہ پہلے انہیں محلے کی ایک بچی نے تنگ کیا جو ٹماٹر مانگنے آئی تھی۔ اس کے بعد انہیں ایک ٹیکسٹ موصول ہوا جس میں کسی نے اپنی مجبوری بتاکر کچھ رقم موبائل میں منتقل کرنے کا کہا تھا۔ پھر عارم نے سفر کے دوران نظر آنے والے بھکاریوں کا تذکرہ کیا ہے۔ آخر میں اپنی آپ بیتی یوں بیان کرتے ہیں:

“میں یہ سوچ رہا تھا کہ ایک معاشرہ میں کس قدر مختلف مزاج کے لوگ پائے جاتے ہیں۔ تربیت، ماحول اور صحبت کا کتنا زیادہ اثر ہوتا ہے۔ مجھے یاد پڑتا ہے کہ میرے لیے کسی سے کچھ مانگنا ہمیشہ سے انتہائی مشکل کام رہا ہے، چاہے اپنی ہی چیز کیوں نہ ہو۔ دوستوں کے مانگنے پر انہیں اپنی چیزیں دے تو دیتا تھا لیکن ان چیزوں کی واپسی کا سوال مجھے شرمندگی کا احساس دلاتا اور نتیجہ یہ نکلتا کہ اگر دوست واپس نہ کرتے تو میں بھی مانگ نہ پاتا اور وہ چیزیں انہی کے پاس رہ جاتیں۔ اور ہاں۔۔۔ لفٹ مانگنا۔۔۔ اکثر لوگ راہ چلتے کسی گاڑی والے سے کچھ راستہ کے لیے لفٹ لے لیتے ہیں لیکن مجھ سے یہ کام کبھی نہیں ہوسکا۔ کبھی بھی نہیں۔۔۔ کبھی ضرورت پڑتی بھی تو میں بس سوچتا ہی رہتا کہ ہاں، اب جو گاڑی آئے گی، اس کو اشارہ کروں گا لفٹ کے لیے لیکن نہ کرپاتا۔۔۔ ایک، دو بار نہیں، بیسیوں بار یہ تجربہ کرکے دیکھا۔ کسی سے کچھ مانگنا۔۔۔ کسی اپنے جیسے سے کچھ مانگنا بہت برا لگتا ہے نا! اور ہے بھی غلط۔۔۔ شاید لفٹ لینے کی حد تک تو چل ہی جاتا ہو لیکن چھوٹی چھوٹی چیزیں دوسروں سے مانگنا، دوسروں کی چیزوں پر انحصار کرنا، یہ بالکل بھی اچھی عادت نہیں۔”

ہممم۔۔۔۔ میرے پاس آخری تحریر فیصل کی ہے، موضوع ہے: “ہمارا نیا نوکیا“۔ یہ ایک بے حد معلوماتی تحریر ہے جس میں فیصل نے اپنے لیے ایک فون خریدنے کے تجربے کو بیان کیا ہے۔ یہ اس سلسلہ کی پہلی تحریر ہے جس میں فیصل بتاتے ہیں کہ فون لینے سے پہلے ان کے پیش نظر کیا کیا چیزیں تھے اور کن کن فیچرز کو مدنظر رکھتے ہوئے انہوں نے اپنے فون کا انتخاب کیا۔ لکھتے ہیں:

“میرے زیر نظر کچھ یہ عوامل تھے:

بطور فون عمومی خصوصیات مثلا آواز کی کوالٹی وغیرہ

ای میل خصوصاً پُش ای میل

انٹرنیٹ بذریعہ وائرلیس لین یا وائی فائی

پرسنل انفارمیشن مینیجمنٹ کی اعلی خصوصیات یعنی کیلنڈر، نوٹس، فون ڈائری، وغیرہ

ذاتی کمپییوٹر/ پی سی میں موجود پم مثلاً مائکروسوفٹ آوٹ لک کے ساتھ معلومات یا ڈیٹا کی ترسیل یعنی سنکرونائزیشن

دفتری فائلوں مثلا ایم ایس ورڈ، ایکسل، ایڈوبی پی ڈی ایف، وغیرہ کو پڑھنے، لکھنے اور ترمیم کرنے کی صلاحیت

مکمل کی بورڈ یعنی ایسا کی بورڈ جیسا آپکے کمپیوٹر میں ہے، کچھ مثالیں یہاں دیکھ لیں

سکرین کا سائز اور کوالٹی، دھوپ میں نظر آنے کی صلاحیت

فون کا حجم ، وزن، ظاہری شکل، ٹھوس پن وغیرہ

بعد از فروخت سروس اور برانڈ کا عمومی تاثر، استعمال شدہ فون کی مارکیٹ میں قدر وغیرہ

ڈیٹا ٹرانسفر کے متفرق طریقے مثلاً تار یا بلیو ٹوتھ

قیمت (یقینا یہ ایک اہم نکتہ ہے)

یاداشت/ میموری میں اضافے کی صلاحیت

فون کے استعمال کی آسانی (آئی فون غالبًا سب سے نمبر لے گیا ہے لیکن سمبیان پر چلنے والے فون عموما ونڈوز والوں سے آسان اور سہل خیال کیے جاتے ہیں)

متفرق خصوصیات مثلا کیمرہ، موسیقی، جی پی ایس کی موجودگی

مارکیٹ میں دستیاب سوفٹویر اپلیکیشنز/ اطلاقیوں کی تعداد اور انکی قیمت۔ یہ آپکے فون میں اضافی خصوصیات پیدا کرتے ہیں۔”

ان سب عوامل کو مدنظر رکھتے ہوئے فیصل نے کون سا موبائل فون لیا، اس کے لیے ان کی اگلی تحریر کا انتظار کیجئے۔

جی قارئین! یہ تھی اس سلسلہ کی پہلی قسط۔ امید ہے آپ کو پسند آئے گی۔ اس میں بہتری کے لیے آپ کی تجاویز اور مشوروں کا ہم کھلے دل سے خیر مقدم کریں گے۔

والسلام۔

پاکستان کی جشنِ آزادی کے موقع پر ہم نے ایک مختصر سا کوئز ترتیب دیا ہے۔ اور ہم تمام اردو بلاگرز کو اس کوئز کے لیے ٹیگ کر رہے ہیں۔ امید ہے آپ سب اس کوئز کے جوابات ضرور دیں گے۔

آپ کو منظر نامہ سے سوالات کاپی کر کے جوابات اپنے بلاگ پر دینا ہوں گے۔
سوالات کے ساتھ تین تین آپشنز دئیے ہیں، آپ کو کسی ایک کا انتخاب کرنا ہو گا۔
اپنے بلاگ پر جوابات لکھتے ہوئے اس پوسٹ کا لنک ضرور دیں، تاکہ سب بلاگرز کو اس کا علم ہو سکے۔
کوئز حل کرنے کی آخری تاریخ 17 اگست یعنی اتوار ہے۔
اس کے بعد منظر نامہ پر نتائج کا اعلان کیا جائے گا۔

سوالات

1- پاکستان کے قومی ترانے کی دھن کب مرتب کی گئی تھی؟

1949 میں
1948 میں
1947 میں

2 - قیامِ پاکستان کی تجویز سب سے پہلے کس نے پیش کی؟

قائد اعظم محمد علی جناح
رحمت علی خان
علامہ اقبال

3 - برطانوی حکومت نے تقسیمِ ہند یعنی قیامِ پاکستان کا اعلان کب کیا؟

3 جون 1947
3 جولائی 1947
3 مئی 1947

4 - برصغیر میں مسلمانوں کے لیے کس مدبر شخص نے سب سے پہلے “قوم” کا لفظ استعمال کیا تھا؟

علامہ اقبال
سر سید احمد خان
قائد اعظم

5 - سب سے پہلا پاکستانی پرچم کس نے تیار کیا تھا؟

امیرالدین قدوائی
اقبال احمد خان
علامہ شبیر احمد عثمانی رح

6 - پاکستان کو سب سے پہلے کس اسلامی ملک نے تسلیم کیا؟

سعودی عرب
ایران
افغانستان

7 - پاکستان کا سب سے پہلے جاری ہونے والا اخبار کون سا تھا؟

نوائے وقت
انقلاب
روزنامہ امروز لاہور

8 - پاکستان کا قومی پرچم سب سے پہلے کہاں لہرایا گیا تھا؟

کراچی
لاہور
اسلام آباد

9 - پاکستان کا پہلا ڈاک ٹکٹ کب جاری ہوا؟

9 جون 1948
9 جولائی 1948
9 اگست 1948

10 - پاکستان کی سرکاری زبان کون سی ہے؟

اردو
انگریزی
دونوں

11 - قائداعظم قیام پاکستان کے بعد کتنا عرصہ حیات رہے؟

تیرہ ماہ
چودہ ماہ
بارہ ماہ

12- پاکستان کا تیسرا بڑا پہاڑ کون سا ہے؟

کے ٹو
نانگا پربت
Gasherbrum-I

13- شلوار قمیض کو پاکستان میں قومی لباس کی حیثیت کب دی گئی؟

یکم دسمبر 1981
یکم دسمبر 1982
یکم دسمبر 1983

14- “پاکستان اسلام کی تجربہ گاہ بنانے کے لیے حاصل کیا گیا ہے” یہ فرمان کس کا ہے؟

علامہ اقبال
قائداعظم
سر سید احمد خان

15- پاکستان کا قومی جانور کون سا ہے؟

بکرا
مارخور
شیر

ہم منظرنامہ پر ایک نئے سلسلہ کا آغاز کرنے جارہے ہیں اور یہ سلسلہ ہے “اس ہفتے کے اردو بلاگ”۔ اس سلسلہ کے تحت ہم ہر ہفتہ ایک تحریر شائع کریں گے جس میں اس ہفتہ اردو بلاگز پر شائع ہونے والی تحاریر کا جائزہ لیا جائے گا۔ اس سے ایک طرف خاص اور اہم تحاریر ایک جگہ جمع ہوتی جائیں گی، دوسری طرف بلاگز کے قارئین میں بھی اضافہ ہوگا اور یہ ایک قسم کی حوصلہ افزائی کا ذریعہ بھی بنے گا۔

ہمیں امید ہے کہ دیگر سلسلوں کی طرح اس سلسلہ کو بھی قارئین میں پذیرائی حاصل ہوگی۔ دعا کریں کہ ہمارا یہ سفر اسی طرح کامیابی سے گامزن رہے اور ہماری مصروفیات میں سے منظرنامہ کے لیے وقت بچتا رہے۔

نیک تمناؤں کے ساتھ

خوش آمدید شعیب۔
@ شکریہ! منظر نامہ کے میزبانوں کا، میں مشکور ہوں آپ کا! جن الفاظ میں تعارف کروایا ہے میں آپ کا مزید مشکور ہوں۔ ویسے ماضی کی کئی تحریریں یہاں وجود رکھتی ہیں۔

ہم اب تک اگرچہ بلاگنگ کے بارے میں سوالات سے ابتداء کرتے آئے ہیں لیکن آپ ہمیں پہلے اپنی تعلیم کے بارے میں بتائیں۔
@ تعلیم کا یہ ہے کہ ماسٹر (بین الااقوامی تعلقات)کر چکا ہو، (خاتون اَن پڑھ ہو کر بھی ماسٹر کر سکتی ہے ہم مرد نہیں، ہاں ہم ماسٹرنی کر سکتے ہیں)۔ اب لاء میں ماسٹر (ایل ایل ایم) کا ارادہ ہے۔ پھر دیکھے گے کیا کیا جائے۔ خواہش تو پی ایچ ڈی (پھیرا ہوا دماغ نہیں) کی بھی ہے!

اگر وکیل نہ ہوتے تو کیا ہوتے؟ کوئی دوسرا آپشن بھی تھا ذہن میں؟
@ بھائی وکالت آخری آپشن تھا میرے لئے! مگر میرے لئے وکالت پہلا و آخری آپشن والد صاحب کا تھا۔ میں فوج میں جانا چاہتا تھا، اس لئے انٹر بھی پی اے ایف کالج سے کیا،مگر فوج نے آئی ایس ایس بی میں جھنڈا دیکھا دیا، پھر ہم نے اپنا رُخ پولیس کی طرف کیا وہاں بھی فائنل انٹرویو میں انگھوٹھا دیکھا دیا گیا! ان دو جگہوں کے علاوہ ہم نے ہوائی میزبان بننے کی کوشش کی وہاں بھی انہوں نے چونی اٹھوائی۔ ان تین کوششوں کے بعد ہم نے والد کی خواہش کو اپنی مجبوری جانا اور وکیل بن گئے! اور اگر وکیل بھی نہ بنتا تو سیاست دان بن جاتا۔ :)

اس پیشہ کی کوئی تین خوبیاں اور تین خامیاں بتائیں۔
@ خوبیاں:
اول معاشرے کو قریب سے دیکھنے و سمجھنے کا موقع ملتا ہے۔ دوئم سیاسی و سماجی شعور حاصل ہوتا ہے۔ سوئم مذہبی و ملکی قانون سے واقفیت کی بناء پر اپنے حقوق و فرائض سے آگاہی ہونے کے سبب اپنی حدود و طاقت کا اندازہ ہو جاتا ہے۔
خامیاں:
اول بندہ وکیل بن جاتا ہے۔
دوئم لا محدود دعا سلام ہونے کی بناء پر آپ گھر و خاندان کو کم وقت دیتے ہو۔
سوئم اس پیشے میں برائی کا روڈ میپ معلوم ہو (مل) جاتا ہے، اس بناء پر اخلاقی طور پر کمزور پڑنے پر آپ شباب و کباب تک رسائی بھی آرام سے حاصل کر سکتے ہیں!

اچھا۔ شعیب! اپنے خاندانی پس منظر کے حوالے سے کچھ بتایئے۔
@ جی میں اچھا ہوں، تب ہی آپ نے اچھا شعیب لکھا ہے ناں! خاندانی پس منظر یہ ہے کہ والد صاحب ضلع سیالکوٹ کے ایک گاؤں روہیلہ سے تعلق رکھتے ہیں جو تحصیل ڈسکہ میں ہے۔ وزیرآباد سے سمبڑیال آتے ہوئے سمبڑیال موڑ سے پہلے یہ گاؤں آتا ہے۔ جاٹ ہوں گھوت گھمن ہے! ابو پی آئی اے میں آفیسر انجیئر ہیں اور وہ کراچی آ گئے تھے اس لئے اپنی پیدائش کراچی کے علاقے لیاری کی ہے۔ معاشی اعتبار سے ایک متوسط فیملی سے تعلق ہے۔

بلاگ کا کب اور کیسے پتا چلا؟
@ بلاگ کا پتا تو بلاگ شروع کرنے کے بعد چلا، مذاق نہیں کر رہا۔ میں آصف کا بلاگ پڑھتا تھا مگر مجھے اُس وقت یہ معلوم نہیں تھا کہ بلاگ و ویب سائیٹ میں کیا فرق ہے، مختلف فری ہوسٹ پر مختلف تجربات کرتا رہتا تھا۔

کب خیال آیا کہ اب خود بھی بلاگ لکھنا چاہئے اور بلاگنگ کی ابتداء میں کیا کیا مراحل طے کیے؟
@ اوپر بیان کیا، بلاگ کا مجھے ابتدا میں نہیں پتا تھا! باقی پاکستانیوں کی طرح میرے پاس بھی وقت برباد کرنے کو بہت تھا! ایسے میں بلاگر پر بھی ایک اکاؤنٹ بنا دیا! ایک پوسٹ بھی دے ماری! مگر اپنی ایک پوسٹ پر ایک تبصرہ نے ابھارا کہ اپنی بات کہنی چاہئے یوں دوسروں کی سوچ جانچنے کا موقع بھی ملے گا اوریوں باتیں کہنے(لکھنے) کے لئے بلاگ کا آغاز کر دیا!
ابتدا میں بلاگ پر صرف تحریر ہی اردو میں دیکھائی دیتی تھی لہذا ہم نے بلاگ کا لباس (ٹیمپلیٹ) اردوانے کی کوشش کی جس میں کامیاب ہوا! پھر اردو بلاگ پر نبیل کا بنایا ہوا اردو ویب پیڈ انٹیگریٹ کرنے میں کامیاب ہو گیا! یوں دوسرے الٹے سیدھے تجربے بھی کرتا رہا! اور یہ سلسلہ چل نکلا۔

آپ کیا سمجھتے ہیں کہ بلاگنگ سے آپ کو کیا فائدہ ہوا ہے؟
@ اپنے فائدے کی بات کرو تو مجھے ذاتی طور پر بات لکھنے کا کچھ کچھ طریقہ (سلیقہ نہیں کہوں گا) آ گیا ہے! اس کے علاوہ مطالعہ و مشاہدے کی عادت مزید پختہ ہو گئی ہے کہ کسی موضوع پر لکھنے کے لئے مطالعہ و مشاہدہ ضروری ہے ناں۔ اس کے علاوہ آپ جیسے دوست ملے ہیں اور ایک لا اُبالی بھائی بھی ملا ہے!

جب آپ نے بلاگ لکھنا شروع کیا تو کس سے متاثر تھے؟ کن بلاگرز کو پڑھا کرتے تھے؟
@ میں نے بتایا کہ میں آصف کا بلاگ پڑھتا تھا مگر میں کسی سے یو ں متاثر نہ تھا کہ اُسے دیکھ کر بلاگ بناؤ۔ اچھی تحریر مجھے متاثر کرتی ہے جس بھی بلاگ کی ہو جو لکھنے والے کے انداز ، معلومات یا خیالات کے اعتبار سے انوکھی ہو (انگریزی یا اردو دونوں) ۔ ایسی تحریروں کو میں دو سے تین بار پڑھتا ہوں ورنہ ایک بار بھی مکمل نہیں پڑھتا!

وقت کے ساتھ ساتھ اردو بلاگنگ کا دائرہ کافی وسیع ہوا ہے۔ کیسا دیکھتے ہیں موجودہ منظر کو اور نئے آنے والے بلاگرز سے کیا توقعات وابستہ ہیں؟
@ موجودہ منظر بہت بہت حوصلہ افزاء ہے! نئے آنے والے بلاگر تکنیکی اعتبار اور اندازِ تحریر دونوں اعتباز سے بہت اچھے اور مجھ جیسے بندے سے کافی آگے ہیں جو اردو بلاگنگ کے لئے خوش آئیند ہے! تعداد میں اضافہ بہت سُست ہے مگر جو آ رہے ہیں وہ بہت پختہ ہیں۔

کون سے بلاگز زیادہ دلچسپی سے پڑھتے ہیں؟
@ سیاسی، سماجی و معاشعرتی موضوعات پر مبنی بلاگ میرے پسندیدہ ہیں، مزاح و اچھی شاعری بھی چونکہ لطف دیتی ہیں لہذا ایسی پوسٹ بھی پڑھتا ہوں۔

آنے والے دس سالوں میں اپنے آپ کو، اردو بلاگنگ کو اور پاکستان کو کہاں دیکھتے ہیں؟
@ سب کو کامیاب! خود کو، اردو بلاگنگ کو اور وطن عزیز کو! اب کامیاب کو بیان کرنے کا مت کہئے گا!

کیا آپ سمجھتے ہیں کہ اردو کو اردو بولنے والوں نے اس کا جائز مقام دیا ہے؟
@ ہم اردو بولنے والے ہیں! ہم نے نہیں دیا اس کو اس کا جائز مقام، صاف سی بات ہے اب تک ہم اس کے مقام کا تعین نہیں کر سکے تو جائز مقام تو دور کی بات ہے!

ملک کو درپیش بڑے بحرانوں میں عدلیہ کا بحران بھی کافی اہم ہے۔ کیسا دیکھتے ہیں اسے اور کیا امیدیں ہیں مستقبل میں؟
@ یہ سوال تو ایک مکمل پوسٹ میں بھی نہیں سما سکتا آپ چند سطروں میں جواب کے خواہش مند ہیں! یہ دراصل عدلیہ کا بحران نہیں انصاف کا بحران ہے! اگر انصاف ہوا تو بحران باقی نہیں رہے گا ورنہ وہ ہی جو شہزاد رائے کہہ رہا ہے کہ “چند لوگوں نے لے لی ہے قوم کی” اب وہ قسمت ہے یا ۔۔۔۔۔۔۔۔۔۔

سماجی کاموں سے بھی کافی دلچسپی ہے آپ کو، اس حوالہ سے اب تک کی کوششوں پر کچھ روشنی ڈالئے۔
@ یہ سوال غلط ہو گیا ہے! یہ بتانے کے نہیں کرنے والے کام ہوتے ہیں!

آگے کیا کیا منصوبے ہیں؟ کیا خواب سجائے ہیں؟ شادی کا کب تک ارادہ ہے؟ ؛)
@ آگے تو وکالت میں نام پیدا کرنے کی خواہش ہے! ابھی (ایک ماہ قبل) جب تمام گھر والے عمرہ کرنے گئے تھے تو ہم نے اُن سے بھی یہ ہی کہا تھا کہ دعا کرنا قانون سمجھ جاؤں اور وکالت میں نام پیدا کرنے میں کامیاب ہو جاؤں۔ باقی شادی کرنا تو سنت ہے یہ بھی کر لیں گے کہ ذرا “اُن” کی تعلیم (ایم بی اے) مکمل ہو جائے۔

جو محبان اردو کسی بھی سطح پر اردو کی خدمت انجام دے رہے ہیں ان کے لیے اور اردو بلاگرز کے لیے کوئی پیغام؟
@ انگریزی چونکہ ہمیں آتی نہیں اس بناء پر ہم بھی خود کو محبان اردو کہلوانا چاہتے ہیں مگر درحقیقت ہم اُردو کے مجبوری کے محبوب ہیں دراصل اردو ہماری محسن ہے۔ حقیقت میں موجود محبان اردو کسی پیغام کے محتاج نہیں!

تفصیلی سوالات تو کافی ہوۓ۔ ایک نظر چھوٹی چھوٹی باتوں کی طرف۔

پسندیدہ:
کتاب؟
مذہبی کتب میں قرآن پاک (ویسے جو بھی پڑھنے کو مل جائے۔ میں نے ساٹھ فیصد کتابیں مانگ کر پڑھی ہیں!)
گیت؟
یہ موسم یہ مست نظارے
پیار کرو تو اِن سے کرو
فلم؟
پالکی (پاکستانی)
کھانا؟
بریانی!
موسم؟
پانچواں محبت کا! (ویسے گرمی کا موسم غریب کا موسم کہلاتا ہے)

صحیح/ غلط:
مجھے بلاگنگ کی عادت ہوگئی ہے۔ صحیح
میں بہت شرمیلا ہوں۔ لڑکوں میں غلط، لڑکیوں میں صحیح
مجھے زیادہ باتیں کرنا اچھا لگتا ہے۔ صحیح
میں ایک اچھا دوست ہوں۔ غلط
مجھے غصہ بہت آتا ہے۔ صحیح

منتخب کریں یا اپنی پسند کا جواب دیں:
پاکستان یا امریکہ؟
پاکستان
ہالی ووڈ یا بالی ووڈ؟
صرف ووڈ (لکڑی) تاکہ ہالی و بالی ووڈ والوں کی پٹائی کر سکو!! (انتہا پسند مت کہہ دینا اب جناب)
نہاری یا پائے؟
نہاری
قائد اعظم یا قائد ملت؟
تفریق مشکل ہے!
آم یا سیب؟
دونوں!
فیوژن یا جنون؟
معتدل
پسند کی شادی یا ارینجڈ؟
ارینجڈ ہی پسند کی شادی ہو!
فورمز یا بلاگ؟
بلاگ
چائے یا کوک؟
لسی!
کرکٹ یا ہاکی؟
کرکٹ!

آخر میں کوئی خاص بات یا پیغام؟
علم حاصل کریں اور اسے پھیلائیں۔

منظرنامہ کے لیے اپنے قیمتی وقت میں سے کچھ حصہ نکالنے کا شکریہ۔

خوش آمدید عارف
@
شکریہ ۔۔۔۔ سب سے پہلے آپ کی ذرہ نوازی کا شکریہ۔ ورنہ جتنا کم میں لکھتا ہوں اس سے مجھے خود اپنے بلاگر ہونے پر شبہ ہوتا ہے اور میں نے سوچا نہیں تھا کہ انٹرویوز کے اس سلسلے میں میرے شامل ہونے کی نوبت آئے گی۔

عارف، سب سے پہلے تو ہم آپ سے اردو اور بلاگنگ کے حوالے سے بات کرتے ہیں۔

1۔ یہ بتائیں کہ آپ نے بلاگنگ کا آغاز کب کیا؟ اور اردو بلاگ پہلی بار کب لکھا؟
@
بلاگنگ میں نے 2004 کے وسط میں شروع کی تھی اور پہلا بلاگ بنایا تھا بلاگ سپاٹ پر۔ یہ انگریزی میں تھا اور شاید ایک آدھ تحریر ہی میں نے وہاں لکھی کیونکہ اس وقت میں کسی بلاگنگ نیٹ ورک کے بارے میں نہیں جانتا تھا۔ لیکن اس طرح کم از کم مجھے معلوم ہوگیا کہ بلاگ کسے کہتے ہیں۔ اردو میں بلاگ 2005 ء میں بنایا۔

2۔ بلاگنگ کا خیال کیسے آیا؟ اور اس وقت اردو بلاگنگ میں کن مسائل کا سامنا رہا؟
@
2004 ء کے اس پہلے بلاگ کے بعد نسبتاً سنجیدگی سے اور بالخصوص اردو میں بلاگنگ کا خیال ذکریا اور اسما مرزا کے بلاگز اور آصف کی ویب سائیٹ کو دیکھ کرآیا۔ بلاگنگ میں میرا سب سے بڑا مسئلہ یہ تھا کہ مجھے بلاگ سپاٹ پر کمنٹس کا طریقہ پسند نہیں ہے۔ یہ کام کو کافی مشکل بنا دیتا ہے۔ میں نے تلاش شروع کی اور Blogsome.com پربلاگ بنانے کی کوشش کی اور کچھ کوشش کے بعد اک افسانہ زندگی بنایا۔

3۔ آغاز میں کیا سوچا تھا؟ صرف بلاگ لکھنا ہے یا ذہن میں کوئی اور مقصد بھی تھا؟
@
اک فسانہ زندگی بناتے وقت میں نے خود کو گمنام رکھا اور سوچا کہ اس طرح زیادہ بے لاگ طریقے سے بلاگ لکھ سکوں گا لیکن میری ازلی غیر مستقل مزاجی یہاں بھی در آئی۔

4۔ آپ نے اردو اور انگریزی دونوں زبانوں میں بلاگنگ کی ہے۔ ذاتی طور پر آپ کو کس زبان میں بلاگنگ کرنا پسند ہے؟
@
سچ یہ ہے کہ مجھے انگریزی میں لکھنا آسان اور اچھا لگتا ہے لیکن میری انگریزی کی تحریریں کم ہی پڑھی جاتی ہیں۔ شاید اس لیے کہ میں کبھی انگریزی بلاگنگ کے کسی نیٹ ورک سے منسلک نہیں ہوا۔

5۔ آپ کے خیال میں ٹیکنالوجی کی دنیا میں اردو اپنا اصل مقام حاصل کر پائے گی؟
@
اردو کو ٹیکنالوجی کی دنیا میں اپنا مقام حاصل کرنے کیلئے صرف ایک درست قدم کی ضرورت ہے اور وہ ہے تیز رفتار نوری نستعلیق فونٹ کی تخلیق۔ ویسا فونٹ جو ان پیج میں استعمال ہوتا ہے۔ ایسے فونٹ بن تو چکے ہیں لیکن کھلے بندوں دستیاب نہیں۔ جس دن یہ فونٹ عام فراہم کردیا گیا اردو بہت آگے چلی جائے گی۔ سرقہ شدہ ان پیج اور ونڈوز کو چھوڑ کر لوگ یونیکس جیسے اوپن سورس پلیٹ فارم اور اوپن سورس سافٹ استعمال کرنا شروع دینگے اور بھی ان گنت فائدے گنوائے جا سکتے ہیں۔

6۔ ایک پاکستانی ہونے کی حیثیت سے اگر آپ سے پوچھا جائے کہ اردو کے فروغ کے لیے آپ نے جو کردار ادا کیا ہے، اسے مختصر بیان کریں تو اس بارے میں آپ کیا کہیں گے؟
@
یہ سوال پوچھ کر آپ نے مجھے شرمندہ کردیا۔ پچھلے سال اوپن آفس کیلئے اردو املا پڑتال کی تیاری پر کام شروع کیا گیا جس کی afx قواعد کی فائل بنانے میں کافی کامیابی بھی ہوئِی شارق اس سلسلے میں میری مدد بھی کر رہے تھے لیکن ایک بار جو ہارڈ ڈسک اڑ گئی تو دوبارہ کام شروع نہ کرسکا۔

7۔ آپ کے خیال میں جو اردو کے لیے کام ہو رہا ہے کیا وہ اطمینان بخش ہے؟
@
سرخ فیتہ ہٹ جائے تو کافی اطمینان بخش کام ہوسکتا ہے۔ محسن حجازی اورسولنگی صاحب جیسے لوگ کی کوششیں افسر شاہی جب ناکام بنا دیتی ہے تو پھر کیا کریں۔

8۔ کن انگریزی یا اردو بلاگرز کو زیادہ پڑھتے ہیں؟
@
اردو میں بدتمیز، افتخار اجمل انکل کو اور انگریزی میں زیک کا بلاگ۔

9۔ عارف، آپ نے اپنے بلاگ کا ایک پروفیشنل انداز میں سیٹ اپ کیا ہے۔ اور ورڈ پریس تھیمز پر بھی لکھا ہے۔ آپ اس بارے میں کچھ بتائیں کہ یہ سب کیسے کیا؟
@
پی ایچ پی سے معمولی واقفیت کی بنا پر اور ورڈ پریس کوڈیکس کو سمجھ سمجھ کر۔ یہ سب ہرگز مشکل نہیں، بس ضروری ہے کہ آپ ورڈ پریس کوڈیکس کے بارے میں معلومات کو بغور پڑھیں۔

10۔ عارف، آپ کا تعلق صحافت سے ہے، اپنے اس کیرئیر کے بارے میں ہمیں کچھ بتائیں گے؟
@
مجھے بچپن میں کہانیاں لکھنے کا شوق تھا، اگرچہ فکشن رائٹنگ اور صحافت دو الگ الگ چیزیں ہیں لیکن جب 17 سال کی عمر میں بوجوہ مجھے ملازمت تلاش کرنا پڑی اور ایک اخبار میں ملازمت ملی تھی کہانی لکھنے کا یہی فن کام آیا یعنی میں ایک تیار شدہ کاپی رائٹر تھا اور یوں ملازمت کیلئے اہل قرار پایا۔ پھر نیوز سینس بڑھا اور گاڑی چلتی جا رہی ہے۔

11۔ اردو بلاگرز یا جو اردو کی ترجیح کے لیے کوشاں ہیں، ان کو آپ کوئی پیغام دینا چاہیں گے؟
@
اردو کی ترویج کیلئے کوشاں لوگ مجھ سے کئی درجے بہتر لوگ ہیں تو کوئی ناصحانہ پیغام تو نہیں ہوسکتا بس ان کا شکریہ ادا کرنا چاہوں گا۔

عارف، یہ تو تھے کچھ رسمی سوالات جن سے قارئین کو آپ کی بلاگنگ اور دوسرے پروجیکٹس کے حوالے سے آگاہی ہوئی۔ اب کچھ جان پہچان کے سوالات۔

پہچان:
1۔ آپ کا نام؟

عارف انجم
2۔ آپ کی جائے پیدائش؟
3۔ آپ حالیہ قیام کہاں ہے؟
4۔ آپ کی زندگی کا مقصد کیا ہے ،کوئی ایسی خواہش جس کی تکمیل چاہتے ہوں؟

.علم حاصل کرنا، حقوق اللہ اور حقوق العباد پورے کرنا۔ خواہش کسی برطانوی یونیورسٹی سے اعلی ڈگری کا حصول
5۔ اپنے پس منظر اور اپنی تعلیم کے بارے میں ہمیں کچھ بتائیں گے؟

پس منظر: ایک سیدھا غیر سیاسی، نسبتاً مذہبی گھرانا۔ تعلیم: او لیول اور اے لیولز کے بعد کئی سال یوکے جانے کی ناکام کوششوں سے تھک کریہاں سے ہی ڈگری حاصل کرنے کی تیاری کر رہا ہوں۔

پسندیدہ:
1۔ کتاب ؟

قرآن پاک اور ڈکشنری
2۔ گانا ؟

کوئی خاص نہیں۔
3۔ رنگ ؟

نیلا
4۔ کھانا(کوئی خاص ڈش)؟

اچھی بنی ہوئی کوئی بھی ڈش
5۔ موسم؟

بہار
6۔ عادت؟

روز کچھ نہ کچھ پڑھنا
7۔ رشتہ؟

وہ جو ابھی بنا نہیں، شریک حیات کا

غلط/درست:
1۔ مجھے بلاگنگ کی عادت ہو گئی ہے؟ غلط ۔۔۔ کاش ہوجاتی
2۔ میں بہت شرمیلا ہوں؟  زیادہ نہیں۔
3۔ مجھے اکثر اپنے کئے ہوئے پر افسوس ہوتا ہے؟  کبھی کبھی
4۔ مجھے زیادہ باتیں کرنا اچھا لگتا ہے؟ غلط
5۔ مجھے ابھی بہت کچھ سیکھنا ہے؟ درست
6۔ مجھے کتابیں پڑھنے کا شوق ہے؟ درست
7۔ میں ایک اچھا دوست ہوں؟ درست
8۔ مجھے غصہ بہت آتا ہے؟ غلط

دلچسپی:
1۔ شاعری سے؟ نہیں
2۔ کوئی کھیل؟ اب تو کوئی نہیں
3۔ کوئی خاص مشغلہ؟ پڑھنا،

برا:
1۔ زندگی کا کوئی لمحہ؟ کسی خاص لمحے کو یاد کرنا مشکل ہے۔
2۔ دوسروں کی کوئی ایسی بات جو آپ کا موڈ خراب کر دیتی ہو؟ ایفائے عہد نہ کرنا۔
3۔ دن کا وقت؟ شام

کیسا لگتا ہے؟
جب بلاگ کی کسی تحریر کو زیادہ پسند کیا جائے: ظاہر ہے اچھا لگتاہے۔
جب کسی تحریر پر ناپسندیدہ / ناگوار تبصرے ہوں: اظہار رائے کی آزادی کا قائل ہوں۔

منتخب کریں یا اپنی پسند کا جواب دیں:
پاکستان یا امریکہ؟ پاکستان
ہالی ووڈ یا بالی ووڈ؟ دونوں
نہاری یا پائے؟ دونوں نہیں،
قائد اعظم یا قائد ملت؟ قائد اعظم
فیوژن یا جنون؟ شہزاد رائے
پسند کی شادی یا ارینجڈ؟ ارینجڈ لڑکے لڑکی کی پسند سے، یا لڑکے لڑکی کی پسند کے بعد والدین کی رضا مندی سے
فورمز یا بلاگ؟ بلاگ
کرکٹ یا ہاکی؟ ہاکی

کچھ ہٹ کر:
بلاگ پر کوئی تحریر لکھتے ہوئے کبھی دکھ ہوا یا رونا آیا؟ نہیں،
بلاگ پر کبھی کوئی تحریر لکھ کر اپنے آپ کو داد دینے کا دل چاہا؟ داد تو نہیں، اچھی تحریر پر اطمینان قلب ہوتا ہے۔
کبھی کسی تحریر کی اشاعت کے بعد یہ سوچا کہ نہ لکھتا تو بہتر تھا؟ جی ہاں اور وہ حذف کردی تھی۔

اگر آپ سمجھتے ہیں کہ ہمیں کچھ پوچھنا چاہیے تھا، لیکن ہم نے پوچھا نہیں اور آپ کچھ کہنا چاہتے ہوں تو آپ کہہ سکتے ہیں۔
@
جی ہاں میرے چشمے کا نمبر، دانتوں کی تعداد، جوتے کا سائز وغیرہ وغیرہ پوچھنا رہ گیا ہے۔ :P

عارف! آخر میں ۔۔۔ اپنے قیمتی وقت میں سے کچھ حصہ منظر نامہ کو دینے کا بہت بہت شکریہ۔

ساتھیو! جب ٹیکنالوجی کی دنیا میں اردو زبان کو فروغ دینے کی کاوشوں کا علم پاکستان کے مشہور، تاریخی اور قدیم شہر فیصل آباد کے ایک نوجوان کو ہوا تو جیسے اسے جنت مل گئی۔ اردو محفل میں شمولیت اختیار کی، پھر اردو بلاگ سیٹ کیا۔ سچ کہیں تو ان کا اردو محفل اور اردو بلاگنگ کی طرف آنا اردو سے محبت کرنے والوں کے لیے ٹھنڈی ہوا کا جھونکا ثابت ہوا۔ اس پرجوش نوجوان نے اپنے ہم وطنوں کو ان کی اپنی زبان یعنی اردو میں نہ صرف اپنے بلند خیالات سے آگاہ کیا بلکہ تیکنیکی معاملات میں مدد بھی فراہم کی۔ اردو بلاگ کی تشکیل کے مراحل کو آسان انداز میں سکھایا اور کئی سوفٹ وئیر کو اردو قالب میں ڈھالنے کے لیے نمایاں کام کیے۔
اس نوجوان کا جوش صرف ٹیکنالوجی کی حد تک نہیں، اپنی قوم اور ملک کے لیے بھی تھا۔ سیاسی معاملات میں اس نے خود کو صرف جوشیلی باتوں تک محدود نہیں رکھا بلکہ جب چیف جسٹس آف پاکستان افتخار محمد چوہدری کو آمریت کے ظلم و ستم کا نشانہ بنایا گیا تو یہ نوجوان اپنا احتجاج ریکارڈ کرانے کے لیے اکیلا سڑک پر احتجاجی پلے کارڈ لیے کھڑا رہتا۔ اپنی زبان سے محبت ہی کا نتیجہ تھا کہ بی۔کام کی پڑھائی کے بعد اس نے اپنا رخ “لسانیات” کی طرف کرلیا۔

آج ہم اسی نوجوان سے بات چیت کریں گے۔ ہمارے آج کے مہمان ہیں شاکر عزیز۔

خوش آمدید شاکر!
بہت شکریہ

کیسے مزاج ہیں؟
الحمد اللہ

  1. اردو بلاگنگ کب شروع کی تھی اور کیسے؟

بلاگنگ 2005 کے آخر میں شروع کی تھی۔ اکتوبر میں۔

2. تو ابتداء میں کن مسائل اور مشکلات کا سامنا کرنا پڑا؟ کہاں کہاں سے مدد لی؟

ابتداء میں بلاگ بلاگسپاٹ پر بنایا تھا جو گوگل کی بلاگنگ سروس ہے۔ تھیم کا مسئلہ کھڑا ہوگیا جس کے لیے نبیل نقوی اور قدیر احمد نے مدد کی۔

3. کیسے خیال آیا تھا اردو بلاگنگ کا اور کیا مقصد ذہن میں تھا؟ صرف بلاگ لکھنے کا یا اردو کے فروغ میں کردار ادا کرنے کا بھی خیال تھا؟
اس وقت لگا یہ فیشن میں شامل ہے سو میں نے بھی ایک بلاگ شروع کردیا۔ قدیر کا بلاگ تھا، زیک کا، نبیل کا اور خاور کھوکھر کا ان کی تحریریں اپیل کرتی تھیں سو میں بھی آگیا اس فیلڈ میں۔

4. سوفٹ وئیر کی دنیا میں جتنا کام دوسری زبانوں میں ہورہا ہے، کیا آپ کے خیال میں اردو کبھی اس مقام کو پہنچ پائے گی؟
ضرور پہنچ پائے گی۔ اردو کو ابھی کمپیوٹر پر آئے عرصہ ہی کتنا ہوا ہے۔

5. کہتے ہیں کہ اردو ایسی زبان ہے جسے اس کے اپنے دیس سے نکال دیا گیا ہے، اس کا ذمہ دار کون ہے؟ اور ہم کیا کرسکتے ہیں؟

اردو کبھی بھی وہ درجہ حاصل نہیں کرسکی جو ہم آج اسے دینےکی باتیں کرتے ہیں۔ یعنی سرکاری و دفتری زبان۔ اردو ہمیشہ سے ایک عوامی زبان رہی ہے اور عوام میں ہی پروان بھی چڑھی۔ سرکار نے تو کبھی اس کی پرورش کی سنجیدہ کوششیں کی ہی نہیں۔ نہ دو سو سال پہلے مغلوں نے اور نہ اب دیسی گوروں نے۔

6. اب تو آپ ونڈوز پر لینکس کو ترجیح دیتے ہیں، اس کی خاص وجوہات سے قارئین کو بھی آگاہ کریں نا۔
وجوہات یہ ہیں کہ لینکس زیادہ سیکیور ہے۔ وائرس اور ہیکنگ کا ڈر خاصا کم ہے۔ مفت ہے اور آزاد مصدر ہے یعنی آپ قانونی طور پر اسے مفت استعمال کرسکتے ہیں اور اس کی سی ڈی دوسروں کو تقسیم کرسکتے ہیں۔ جبکہ ونڈوز کے ساتھ ایسا نہیں۔

7. اردو کے فروغ کے لیے اپنا کردار کیا دیکھتے ہیں؟ مستقبل میں اس حوالہ سے کیا ارادے ہیں؟
اردو کے فروغ کے لیے بس کبھی کبھی ابال اٹھتا ہے تو کچھ ہوجاتا ہے۔ ورڈپریس کا ترجمہ کیا تھا کبھی جو اب اپڈیٹ مانگتا ہے۔ پچھلے دنوں اردو ویب لائبریری کے لیے ایک اردو ایڈیٹر بنایا تھا تاکہ ٹائپنگ آسانی سے ہوسکے۔ تو ایسے ابال اٹھتے ہی رہیں گے۔ خاصے پلان ہیں مستقبل کے لیے۔ اب جبکہ سی شارپ پر کچھ نہ کچھ دسترس ہے تو اردو کے لیے لینکس پر بھی سافٹویر ڈویلپ کرنا پسند کروں گا۔ اردو لسانیات میں اپنی کسی ڈگری کا ریسرچ ورک کرنے کی آرزو ہے تاکہ اردو کا بھلا بھی ہوجائے اور میرا بھی۔ دیکھئیے کب ہوتا ہے یہ سب۔

8. پرانے اور نئے بلاگرز میں کون پسند ہے؟ کسے شوق سے پڑھتے ہیں؟
افتخار اجمل، ڈاکٹر راجہ افتخار، خاور کھوکھر کی تحاریر اچھی ہوتی ہیں۔ قدیر بھی اچھا لکھتا ہے لیکن بھاگ جاتا ہے آج کل تو۔ بدتمیز کی ٹیکنالوجی پر پوسٹس اور امریکہ کی لوکل زندگی پر تحاریر سے خاصا مرعوب ہوجاتا ہوں۔ راہبر اپنے بلاگ پر اپنی چھوٹی چھوٹی باتوں کی پھلجھڑیاں چلاتا رہتا ہے جنھیں پڑھ کر اچھا لگتا ہے۔ ایک بلوچ بھائی ہیں جیوانی سے وہ بھی اچھا لکھتے ہیں اگر کبھی آجائیں تو۔ باقی سارے اچھے ہیں اگر متواتر لکھتے رہیں تو۔

جیسا کہ امتحانات میں اکثر دو حصے ہوتے ہیں۔ ایک تفصیلی سوالات کا اور ایک مختصر سوالات کا۔ تفصیلی سوالات کا حصہ یہاں مکمل ہوا۔ اب ایک نظر مختصر سوالوں کی طرف۔

پہچان:

مکمل نام؟
محمد شاکر عزیز

جائے پیدائش؟
فیصل آباد

حالیہ قیام؟
فیصل آباد

زندگی کا مقصد؟
اپنے ملک و قوم اور اپنے لیے کچھ کرسکوں

خاندانی اور تعلیمی پس منظر؟
خاندان پاکستان کا ایک متوسط گھرانا۔ تعلیم بی کام کے بعد ایم ایس سی اپلائڈ لنگوئسٹکس کا طالب علم۔ کمپیوٹر میں غیر نصابی شدھ بدھ یعنی بغیر سند کے۔

پسندیدہ:
کتاب؟
علیم الحق حقی کی عشق کا عین اور عشق کا ش

گیت؟
جو اچھا لگ جائے۔

فلم؟
ہر وہ فلم جو پسند آجائے۔

کھانا؟
سب چلتا ہے۔

موسم؟
جب اندر کا موسم خوشگوار ہو تو ہر موسم ہی اچھا لگتا ہے۔

صحیح/ غلط:

مجھے بلاگنگ کی عادت ہوگئی ہے۔
عادت ہوجاتی ہے لیکن کبھی کبھی۔

میں بہت شرمیلا ہوں۔
کہنے والے منہ پھٹ کہتے ہیں۔

مجھے زیادہ باتیں کرنا اچھا لگتا ہے۔
جب موڈ ہو تب ڈھیر ساری ورنہ چپ۔

میں ایک اچھا دوست ہوں۔
دوستوں کا دوست ہوں۔

مجھے غصہ بہت آتا ہے۔
کبھی کبھار بہت آتا ہے۔

منتخب کریں یا اپنی پسند کا جواب دیں:

پاکستان یا امریکہ؟
برا کوئی بھی نہیں ہوسکتا ہے کل امریکہ جانا پڑ جائے لیکن آنا تو پاکستان میں ہی واپس ہے۔ سو پاکستان کچھ زیادہ امریکہ باقی ممالک کی طرح مناسب سا

ہالی ووڈ یا بالی ووڈ؟
جس کی فلم ہاتھ آجائے۔

نہاری یا پائے؟
پائے پنجاب کا کھانا ہے اس لیے۔

قائد اعظم یا قائد ملت؟
لیڈروں کی چھوڑیں جی۔ جو مرگئے وہ بھی کچھ نہیں کرسکتے جو جیتے ہیں وہ بھی لاچار ہیں۔

آم یا سیب؟
جو مل جائے۔

فیوژن یا جنون؟
گانا پسند آنا چاہیے۔

پسند کی شادی یا ارینجڈ؟
وقت بتائےگا۔

فورمز یا بلاگ؟
دونوں۔

چائے یا کوک؟
جو مل جائے۔

کرکٹ یا ہاکی؟
کرکٹ

 آخر میں کوئی خاص بات یا پیغام؟

پیغام وہی کہ خوش رہیں، خوش رکھیں وغیرہ وغیرہ۔ مختصر سی زندگی میں ایک بات نوٹ کی ہے جس کے پاس ہنر ہوتا ہے وہ کبھی مار نہیں کھاتا۔ چاہے وہ موچی ہے، راج مستری ہے یا کوئی سبجیکٹ سپیشلسٹ۔ اپنی فیلڈ میں اتنی مہارت پیدا کرلیں کہ آپ دوسروں کی ضرورت بن جائیں۔
اور آپ کا شکریہ اب میں بھی اپنے آپ کو بلاگنگ کا بابا سمجھنے لگوں گا ;)

شاکر، اپنا قیمتی وقت نکال کر منظر نامہ پر انٹرویو دینے کا بہت شکریہ۔

خدا جانے سیدوں کی بدعا کا اثر تھا کے موئے یہودیوں کی سازش، امریکی امداد اور بجلی، طاعون کی طرح پورے معاشرے کو نگل گئے۔ اے لو! بھیا امریکی امداد اور بجلی کا تعلق کیوں نہیں ہے؟‌ دونوں ہوں تو دھڑکا لگا رہتا ہے جانے کم بخت کب چلی جائیں، اور نہ ہوں تو “اب کے ساون گھر آجا“ کی مثال۔ خدا لگتی کہتا ہوں، لگی لپٹی کی عادت نہیں اب تو سانس لینے کے لیے بھی بجلی کے محتاج ہوگئے ہیں‌۔ دل پر ہاتھ رکھوں، رہا تو ہم سے بھی نہیں جاتا اس قاتل کے بغیر۔ لیکن بے رخی کی بھی حد ہوتی ہے، اتنے نخرے تو امراؤ جان کے بھی کسی نے نہیں اٹھائے۔ میاں پرانے آدمی ہیں لیکن جدید کھلونوں کا شوق عمر دیکھتا ہے کیا؟ خیر سے آٹھ دس برقی کھلونوں کے مالک ہیں، اب آپ ہی سوچیں کھلونے ہوں تو کھیلنے کو دل تو مچلتا ہے نا؟ پر یہ ہیں کہ روٹھی رہتی ہیں، دوسرے برس کی منگتیر کی طرح۔

ارے میں تو کہتا ہوں بہت ہوا۔ سوچتا ہوں صاحب لوگوں کے بنگلے کے پچھواڑے کٹیا ڈال لیتے ہیں اُنہیں بجلی کی کیا کمی۔ اتنی بجلی تو اپنی جیب میں رکھے پھرتے ہیں جتنی ہمارے جیسے قلندر زندگی بھر استعمال بھی نہ کرسکیں۔ خدا غارت کرے ان فرنگیوں کو، ارے کافروں جب جدید چیزیں بنانی ہی ٹہریں تو کچھ بغیر بجلی کے بھی بنالو، لیکن کہاں! مسلمانوں کا بھلا تو تم فرنگیوں سے دیکھا ہی نہیں جاتا، کوئی بڑھکوں سے چلنے والی مشین بناؤ تو جانیں، پھر کہیں گے پھیکی رنگت کی جے۔

اردو بلاگز پڑھنے والے قارئین یقینا اس مصرعہ سے بخوبی واقف ہوں گے کہ یہ صرف ایک مصرع ہی نہیں بلکہ اردو کے ایک معروف بلاگ کا عنوان بھی ہے۔ آج اسی بلاگ کے لکھاری ہمارے مہمان ہیں۔ ان کی تحریروں میں پختگی پائی جاتی ہے۔ مختلف موضوعات پر لکھتے ہیں۔ مذہب، سیاست، عالمی، سماجی اور قومی مسائل، طنز و مزاح، انفارمیشن ٹیکنالوجی سمیت دیگر کئی موضوعات پر تحاریر کو آپ نے اپنے بلاگ کی زینت بنایا ہے۔ ان کا شمار یقینا بہترین اردو بلاگرز میں ہوتا ہے۔ جی ہاں، آج سلسلہ شناسائی میں ہمارے مہمان ہیں، راشد کامران۔

خوش آمدید راشد کامران

شکریہ۔۔ اور اتنے اچھے الفاظ میں متعارف کروانے پر میں مزید مشکور ہوں ورنہ میں تو ایک عام سا بلاگر ہوں

راشد، سب سے پہلے تو ہم آپ سے اردو اور بلاگنگ کے حوالے سے بات کرتے ہیں۔

1۔ یہ بتائیں کہ آپ نے بلاگ کب لکھنا شروع کیا اور اردو بلاگنگ کا آغاز کب کیا؟

@

نومبر 2004 میں بلاگنگ شروع کی تھی، قریبا ایک سال بعد اردو بلاگنگ کی طرف مائل ہوا اور پہلا بلاگ 13 ستمبر، 2005 کو لکھا ۔۔ یہ رہا اسکا لنک

http://ublog.urdu-blog.com/_post.aspx?postID=2

2۔ بلاگنگ کا خیال کیسے آیا؟ اس وقت اردو بلاگنگ میں کن مسائل کا سامنا رہا؟

@

یونیورسٹی کے دنوں‌ میں تکنیکی مضامین پر بلاگز دیکھ دیکھ کر خود بھی شوق جاگا اور پھر اردو بلاگنگ کی طرف بھی آگئے۔ مسائل وہی عمومی تھے فانٹس، یونیکوڈ وغیرہ وغیرہ لیکن مسائل حل کرنے والے بھی میدان میں موجود تھے چناچہ جلد ہی یہ ایک دلچسپ میدان بن گیا۔

3۔ ابتداء میں صرف بلاگ لکھنے کا خیال تھا یا ذہن میں کوئی اور مقصد بھی تھا؟

@

اردو بلاگز کی ابتدا میں صرف اور صرف مزاح لکھنے کا ارادہ تھا لیکن جیسے جیسے بات آگے بڑھی نئے میدان کھلتے گئے لیکن اب بھی طنزومزاح اور ٹیکنالوجی ہی میری اولین ترجیح ہے۔

4۔ آپ کے خیال میں ٹیکنالوجی کی دنیا میں اردو اپنا اصل مقام حاصل کر پائے گی؟

@

میں اس سوال کو تھوڑے مختلف انداز میں دیکھتا ہوں ۔۔ جس جس انداز میں اردو بولنے والے ٹیکنالوجی میں مہارت حاصل کرتے جائیں گے اسی انداز میں زبان بھی زبان کا مقام بھی متعین ہوتا جائے گا۔۔ جیسے سائنس کے اولین دنوں کی اصطلاحات عربی، پھر لاطینی اور پھر انگریزی ۔۔ کچھ بعید نہیں کل چائینیز، پھر ہندی اور اردو بھی ۔۔ یہ ہمارے اوپر ہے کے ہم اردو کے لیے کس مقام کا تعین کرتے ہیں۔

5۔ ایک پاکستانی ہونے کی حیثیت سے اگر آپ سے پوچھا جائے کہ اردو کے فروغ کے لیے آپ نے جو کردار ادا کیا ہے، اسے مختصر بیان کریں تو؟

@

مختصر بیان تو “کچھ بھی نہیں“‌ :) ایک بلاگنگ ویب سائٹ ورڈ پریس سے پہلے۔ کچھ فانٹس اور ختم شد. ویسے اپاچی لیوسین میں اردو پراسیسنگ کا اضافہ کیا ہے۔ رولز انجن مکمل ہوجائے تو انشاء اللہ پراجیکٹ کا حصہ بنانے کی درخواست کروں گا۔

6۔ آپ کے خیال میں جو اردو کے لیے کام ہو رہا ہے کیا وہ اطمینان بخش ہے؟

@

کافی وسیع سوال ہے ۔۔اگر اردو کا مکمل میدان مراد ہے تو میرا خیال ہے مجرمانہ حد تک غفلت برتی جارہی ہے ۔۔ انفرادی سطح پر ہی ہے جو بھی سامنے ہے۔۔ اور کتاب پڑھنے اور لکھنے کا تو جیسے رواج ہی نہیں رہا۔۔ اور اگر ٹیکنالوجی اور اردو کے حوالے سے سوال ہے تو کارپوریٹس جو “اردو“ سے پیسے بنا رہی ہیں وہ اردو کا حصہ نہیں نکال رہیں‌۔۔

7۔ اردو بلاگرز میں کس کو زیادہ پڑھتے ہیں؟

@

اردو بلاگرز میں سب کو پڑھتا ہوں۔۔ جس دن جو بلاگ شائع ہوتا ہے میں اسے پڑھتا ہوں۔ ہاں اگر پوچھیں کے انتظار کس کا کرتا ہوں تو افضل جاوید(میرا پاکستان)، افتخار اجمل اور (بد)تمیز صاحبان کے بلاگز کا انتظار رہتا ہے۔

8۔ اردو بلاگرز یا جو اردو کی ترجیح کے لیے کوشاں ہیں، ان کو آپ کوئی پیغام دینا چاہیں گے؟

@

بس یہی کہنا ہے کے آپ لوگ اردو بلاگنگ کے بانیان میں سے ہیں ۔۔ تاریخ میں اتنی اہمیت ہی بہت ہوا کرتی ہے چناچہ لگے رہیں۔

9۔ بلاگ پر کوئی تحریر لکھنے سے پہلے اسے کن مراحل سے گزارتے ہیں؟

@

کوئی خاص طریقہ نہیں۔۔ کبھی لکھا اور شائع کردیا، کبھی لکھا اور ضائع کردیا اور کبھی سوچا لیکن لکھا نہیں۔۔

راشد، یہ تو تھے کچھ رسمی سوالات جن سے قارئین کو آپ کی بلاگنگ وغیرہ کے بارے میں آگاہی ہوئی۔ اب کچھ سوال آپ کے متعلق۔

پہچان:

1۔ آپ کا نام؟

راشد کامران

2۔ آپ کی جائے پیدائش؟

کراچی پاکستان

3۔ آپ حالیہ قیام کہاں ہے؟

لاس اینجلس، ریاست (ہائے)‌ متحدہ امریکہ

4۔ آپ کی زندگی کا مقصد کیا ہے ،کوئی ایسی خواہش جس کی تکمیل چاہتے ہوں؟

بس ایک خواہش ہے کے اپنی زندگی میں پاکستان کو ایک باوقار اور ترقی یافتہ مملکت دیکھ سکوں تاکہ پھر کسی کو اپنا گھر مستقل چھوڑ کر نہ جانا پڑے

5۔ اپنے پس منظر اور اپنی تعلیم کے بارے میں ہمیں کچھ بتائیں گے؟

 ایک عام سا پاکستانی۔۔ عام سے شوق اور بڑے بڑے خواب۔ میں نے کراچی یونیورسٹی سے کمپیوٹر سائنس میں بی ایس کررکھا ہے ۔۔ فاسٹ اور پھر محمد علی جناح یونیورسٹی سے ایم ایس کرنے کی کوشش کی لیکن دل نہیں لگا۔۔ اب زندگی میں تھوڑا ٹہراؤ آیا ہے تو دوبارہ تعلیم کے حصول کا ارادہ ہے۔۔

پسندیدہ:

1۔ کتاب ؟

راجہ گدھ (بانو قدسیہ)

2۔ گانا ؟

کوئی ایک نہیں بدلتا رہتا ہے ۔۔ آج کل ہپ ہاپ گانے سر فہرست ہیں

3۔ رنگ ؟

نیلا

4۔ کھانا (کوئی خاص ڈش) ؟

شدید بھوک میں کچھ بھی

5۔ موسم

معتدل

غلط/درست:

1۔ مجھے بلاگنگ کی عادت ہو گئی ہے؟

درست

2۔ میں بہت شرمیلا ہوں؟

شادی کے دن کوشش تو کی تھی

3۔ مجھے اکثر اپنے کئے ہوئے پر افسوس ہوتا ہے؟

کبھی کبھی جب میں سڑک پر ریس لگاتا ہوں

4۔ مجھے زیادہ باتیں کرنا اچھا لگتا ہے؟

اگر موضوع پسند کا ہو اور مخاطب بھی باتیں کرنے کا شوقین ہو

5۔ مجھے ابھی بہت کچھ سیکھنا ہے؟

دو دفعہ درست

6۔ مجھے کتابیں پڑھنے کا شوق ہے؟

یقیناَ

7۔ میں ایک اچھا دوست ہوں؟

یہ تو دوست درست بتا سکتے ہیں۔ کوشش تو کرتا ہوں

8۔ مجھے غصہ بہت آتا ہے؟

آتا تھا ۔۔ اب نہیں

9۔ میں اچھا بلاگر ہوں؟

ہی ہی ہی ہی

آپ کے خیال میں:

1۔ سوال کرنا آسان ہے یا جواب دینا؟

اچھا اور مناسب سوال کرنا زیادہ مشکل ہے

2۔ بہترین رشتہ کون سا ہے؟

خالق کے بعد بے شک والدین کا

3۔ آپ کی اپنی کوئی ایسی عادت جو آپ کو خود بھی پسند ہو؟

تبدیلی کی خواہش رکھنے کی عادت

دلچسپی:

1۔ شاعری سے؟

بہت زیادہ۔

2۔ کوئی کھیل؟

پہلے کرکٹ اور فٹبال۔۔ اب باؤلنگ اور فوزبال

3۔ کوئی خاص مشغلہ؟

فلم بینی

برا:

1۔ زندگی کا کوئی لمحہ؟

جب گن پوائنٹ پر میری پہلی محبت میری نئی نویلی گاڑی چھینی گئی ۔۔

2۔ دوسروں کی کوئی ایسی بات جو آپ کا موڈ خراب کر دیتی ہو؟

پاس

3۔ دن کا وقت؟

پانچ بجے شام (صرف جمعہ کے دن )

کیسا لگتا ہے؟

جب آپ کی تعریف کی جائے:

کیا شرمانے والے سوال کا جواب دوبارہ دیا جاسکتا ہے؟

جب بلاگ کی کسی تحریر کو زیادہ پسند کیا جائے:

اچھا لگتا ہے کے چلو کچھ تو اچھا کیا :)

جب کسی تحریر پر ناپسندیدہ / ناگوار تبصرے ہوں:

اگر اختلافی رائے ہو تو یہی تو بلاگز کا حسن ہو۔۔ اگر بے سروپا یا یتیم تبصرہ (بغیر نام کا) ہو تو عجیب لگتا ہے کے اتنی بولڈ رائے اور بندہ غائب :)

منتخب کریں یا اپنی پسند کا جواب دیں:

پاکستان یا امریکہ؟

امریکہ (وجہ آزادی)

ہالی ووڈ یا بالی ووڈ؟

ہالی وڈ (تخلیقی عمل)

نہاری یا پائے؟

دونوں

قائد اعظم یا قائد ملت؟

دونوں نہیں‌ (آزادی کا اظہار)

آم یا سیب؟

آم

فیوژن یا جنون؟

فیوژن (پختگی)

پسند کی شادی یا ارینجڈ؟

ارینجڈ (فرار کے راستے بند سب پر)

فورمز یا بلاگ؟

بلاگز (مکمل آزادی اظہار رائے)

چائے یا کوک؟

چائے (کافی ملا کر)

کرکٹ یا ہاکی؟

کرکٹ

کچھ ہٹ کر:

- بلاگ پر کوئی تحریر لکھتے ہوئے کبھی اداس ہوئے یا رونا آیا؟

ہاں ۔۔ پھول جیسی معصوم چھ چھ سال کی بچیوں کی عصمت دری کی جاتی ہے تو اپنے انسان ہونے پر رونا آتا ہے۔۔ اس پر ایک بلاگ لکھا تھا لیکن وہ صرف بھڑاس نکالنے کے لیے تھا لہذا شائع نہیں کیا۔

- کبھی کوئی تحریر لکھ کر اپنے آپ کو داد دینے کا دل چاہا؟

ایک تحریر لکھی تھی “گدھے“‌ گو کے استاد پطرس کا چربہ سا ہی ہے لیکن دل خوش ہوا تھا لکھ کر

- کبھی کسی تحریر کی اشاعت کے بعد یہ سوچا کہ نہ لکھتا تو بہتر تھا؟

میرا نہیں خیال۔۔ کبھی کبھار کچھ ایسا ہوجاتا ہے کے شاید کچھ مختلف فکر کے لوگوں‌کو ناگوار گزرتا ہو لیکن بہر حال نکتہ نظر ہی تو ہے۔

اگر آپ سمجھتے ہیں کہ ہمیں کچھ پوچھنا چاہیے تھا، لیکن ہم نے پوچھا نہیں اور آپ کچھ کہنا چاہتے ہوں تو آپ کہہ سکتے ہیں۔

@

جلا ہے جسم جہاں دل بھی جل گیا ہوگا

کریدتے ہو جو اب راکھ جستجو کیا ہے ؟‌

راشد،آخر میں ۔۔۔ اپنا قیمتی وقت نکال کر منظر نامہ کے لیے جواب دینے کا بہت بہت شکریہ۔

خوش نصیبی مکمل طور پر میری ہے ۔۔ آپ لوگوں کا شکریہ

“ارے دیکھو تو سہی، ابھی اتنے گھنٹے بعد بجلی آئی تھی اور منحوس مارے پھر لے گئے۔۔۔” “میرا اتنا اچھا ڈرامہ آرہا تھا ٹی۔وی پر۔۔۔” “مااااااں۔۔۔ پھر بجلی چلی گئی۔۔۔ میں نے کام کرنا تھا۔” ایسے مکالمے تو ہمارے گھروں میں سنے جانا معمول بن گیا ہے۔۔۔ اگر آپ پاکستان میں رہتے ہیں یا کبھی رہنے کا اتفاق (حسن اتفاق یا سوئے اتفاق؟) ہوا ہے تو یقینا اس مصیبت کا سامنا ضرور کیا ہوگا۔ تو پھر کیا خیال ہے، ہوجائے اس موضوع پر ایک ہلکی پھلکی تحریر۔۔۔؟

جی ہاں، منظرنامہ کے سلسلہ “نقطہ نظر” کے لیے ہمارا نیا موضوع ہے: “ہائے رے بجلی” اور ہمیں امید ہے کہ اس موضوع پر ہمیں دلچسپ تحاریر پڑھنے کو ملیں گی۔۔۔!

۔۔۔۔۔۔۔۔۔۔۔۔۔۔۔۔۔۔۔۔۔۔
جو قارئین منظرنامہ کے لیے لکھنا چاہتے ہیں لیکن انہیں رجسٹر ہونے کا جھنجٹ گوارا نہیں، ان کے لیے سہولت ہے کہ اب وہ ہمیں اپنی تحریر ای۔میل کرسکتے ہیں۔ ہم خود ان کے نام سے تحریر شائع کردیں گے۔ ہمارے ای۔میل ایڈریس کی تو خبر ہے نا؟